8個鮮為人知的「米」故事

Thursday, July 21, 2016|

平時食飯就食得多,咁以下呢8個關於米嘅故事你又知幾多呢?

1. 香港人究竟食幾多米?

1

俗語話「食米唔知米貴」,其實你知唔知,一碗飯裡面有幾多粒米?答案揭曉:一碗飯大約係有4000粒米,以香港平均每人每日食1.5碗飯嚟計,一年365日,一個人一年就會食大約2,400,000粒米。而香港人口有700萬,即係話全港每年會食16.8 x 1012 咁多粒米。哇!排起嚟足足有成1.7億棟ICC咁高啊,仲可以環繞地球約2100周添!

2.「你食左飯未?」

2

香港人碰面,往往都會講呢句「用個肺講出來」嘅開場白,究竟我地點解會有呢句「肺話」呢?有兩個說法,第一個呢,就係因為香港以前好窮,唔係個個人都有米飯食,所以我地真係關心人地有無飯食;另外,開場白好反映一個地方嘅當地文化,香港民以食為先,寒暄自然商飯事;英國天氣陰多晴少,見面就問天氣;日本戰後生活困苦,打招呼就問健康(元氣)。如果想再型啲,下次可以試下咁講:「你,食左,飯,未?」。

3.「靚仔、靚女行街!」

3

去茶餐廳聽到人嗌「靚仔」、「靚女」,唔洗兩頭望,因為唔係叫緊你。香港茶餐廳有唔少地道術語,有啲係同米有關,例如「靚仔」即係指白飯,「靚女」就指白粥,因為飯同粥都係一片潔白,取其廣東話好似靚仔靚女皮膚「青靚白淨」之意,慢慢就變成茶餐廳嘅術語。

4. 盞鬼職業之一 – 溝米師

4

專業賣肉嘅叫「肉類分割技術員」,專業賣米嘅又應該點叫呢?原來曾幾何時,香港有種專業叫「溝米師」。話說六、七十年代米舖興盛嘅時候,人人都會去 「糴」米。 「糴」 字讀「笛」,即係「買」咁解。當時間間米舖都會有溝米師傅坐鎮,佢地嘅工作就係負責控制米的質素,並運用經驗溝出適合客人口味的米。由於當時米舖會散買唔同種類嘅米,泰國、澳洲、內地同香港米樣樣俱全,每位「米飯班主」都會有自己嘅magic formula,全部都係靠溝米師憑手感同經驗溝出不同配搭。

5. 盞鬼職業之二 – 品飯員

5

所謂行行出狀元,原來齋食飯都可以食出條血路!喺臺灣有種職業叫「品飯員」,新稻米上市前一定要經過佢地把口品嘗一下,確認香度、軟硬度都冇問題先可以出產,所以品飯員平均每年要食百幾種米。份工只係食飯,咁易做?當然唔係,要做品飯員,先決條件係唔可以食煙、飲酒,而且要經過嗅覺、味覺等感官嘅嚴格測驗同篩選,仲要經過長達幾星期嘅訓練先做到。據聞做品飯員嘅,平時開餐見到米飯都會怕怕。

6. 神奇「飛砂走石機」

6

「飛砂走石機」聽落好似叮噹啲法寶,大嘅米舖一定會有一部坐陣。「飛砂走石機」其實係「吹米機」,又或者叫「風米機」。佢係一部古老嘅儀器,用風力將米粒同其他雜質,例如碎米、穀殼、砂礫等等分開。經過「飛砂風中轉」,客人就可以食到乾淨嘅米,同叮噹法寶一樣咁神奇。

7. 香港飢荒點樣算?

7

小編係一個無飯不歡嘅「大飯桶」,所以成日諗:如果香港鬧飢荒,又冇任何食品進口,咁點算?查下資料先知原來唔洗驚,因為香港一直都有白米儲備!自從2003年起,香港嘅食米儲備就一直維持係1.3 – 1.4 萬公噸,夠全港人食足15日。

8. 米唔單止用嚟食

8

米除左食之外,原來仲有好多用途,例如用嚟整BB嘅米袋、細個玩嘅「抓子」,或者攞嚟問米通靈。米仲有一個好厲害嘅用途:將未熟嘅生果擺落個米缸度,好快就變熟。原來米係會釋放一種叫「乙烯」嘅物質,本身有催熟作用,而米缸係密封嘅,乙烯唔容易散去,積下積下就可以加速生果成熟嘅速度。

聽完呢8個冷知識,係咪好想知道更多有關米嘅有趣故事呢。我地活現香港(Walk in Hong Kong今個星期六(23/7)將會同PMQ元創方合作舉辦童行同感 — 「夏日微旅程」- 米飯班「煮」導賞團。我們首先從PMQ味道圖書館出發,分享米嘅文化故事,聽聽米嘅來源。再到老舖「糴」米、到熟食店睇睇腸粉係點樣拉製而成、仲會同大家拋擲米抓子、食米造小吃,來一趟舌尖嚐米之行,「米」足全程!