百「竹」咁多爪—8個關於竹的冷知識

Tuesday, August 16, 2016|

或者你會覺得,竹同我地嘅日常生活大纜都扯唔埋,但其實每一個人都應該見過、講過,甚至食過同竹有關嘅事物。而原來好似竹咁簡單嘅物料,都充滿乾坤!

1. 香港有無竹嫁?

1

香港唔少嘅地名,都係同竹有關,例如「竹園」同埋「黃竹坑」,真係因為以前個度有竹林而咁樣命名架!而原來今時今日,喺香港呢個石屎森林裡面都仲會搵到竹嘅蹤跡,例如係大埔墟嘅燕岩竹林隧道同埋畢架山,又或者喺錦田都有個農場種植唔少竹蔗。

2. 竹昇妹/竹昇仔?

2

「竹星仔/妹」通常指啲係外國出生而淨係識得講英文嘅華人,其實點解咁叫?原來「竹昇」係指竹槓,即係一啲多節中間又唔貫通嘅竹枝,比喻佢地唔精通中華文化。咁點解唔叫「竹槓仔」呢?就係因為「降」「降」聲唔好聽又唔好意頭,所以就調番轉用「升」,「竹昇仔/妹」就係咁黎啦。

3.「有乜依郁,揸住碌竹」

3

另外有句廣東話俚語叫「有乜依郁,揸住碌竹」,意思就係指如果預視到有咩危機,最好一開始都搵定啲幫手,就算有咩突發事都有啲揸拿。咁無啦啦點解又關竹事呢?有傳係因為以前過河嘅時候,大家都要靠一枝大竹撐過去對面岸,如果無左碌竹就過唔到河,所以遇到風浪嘅時候拎住枝竹就會覺得安心啲!

4.「竹門對竹門,木門對木門」

4

以前啲人話要門當戶對,「竹門對竹門,木門對木門」。雖然而家好少見到竹,但以前竹原來係一樣好平嘅物料,經常用來做傢俱。因為竹所需嘅生長環境好簡單,生長同繁殖速度好快,所以供應非常充足。竹仲係生長得最快嘅植物之一,一日之內可以高成40厘米,全球最高嘅竹仲有成14層樓高添!

5. 百「竹」咁多爪之一-熊貓先食竹?

5

好問題,答案緊係「唔係」啦!我地係日常生活中都會經常食到竹!竹蔗係竹嘅品種之一,我地除左可以飲到清甜嘅竹蔗水之外,喺唔少餸都會用到竹筍。 竹亦都成日拎黎煮野食嫁。竹吸水嘅特性非常適合用黎整點心蒸籠;而竹嘅彈性亦都可以用黎整竹昇麵,用竹竿壓製麵條呢個技術仲巴閉到被列入非文質文化遺產添!

6. 百「竹」咁多爪之二-「大碌竹」

6

一大碌竹可以用黎做乜? 原來仲可以用黎食煙。七十年代會見到唔少人係街邊拎住一碌竹,其實就係食緊水煙。水煙筒係用粗嘅竹竿製成,竹筒入面會放水,中間再插另一條管去燒啲煙絲。聽講呢種水煙會濃味啲,俾水霧化左嘅煙會少啲毒素又無咁嗆喉,所以以前好受歡迎。

7. 百「竹」咁多爪之三-懸崖邊都搭到竹棚!

7
香港密密麻麻嘅高樓大廈絕對係香港嘅標誌,原來用竹棚去起高樓嘅方法只係得香港用嫁咋。除左搭建築棚之外,香港嘅竹戲棚都好有特色,黎緊農歷七月香港唔同地方都有盂蘭勝會做神功戲,大家不妨留意下喎。咁點解用竹唔用型仔啲嘅金屬架?咁係因為竹又輕,又可以隨意剪短,如果想好似蒲台島天后誕係懸崖邊起戲棚就一定要用竹先搭到棚!聽聞搭棚仲有啲有趣禁忌,例如搭緊棚嘅時候唔可以唱歌同埋番工途中見到女人洗頭就唔好去番工,不過原因就不得而知啦。

8. 百「竹」咁多爪之四-竹都可以著上身!

OLYMPUS DIGITAL CAMERA

你有無諗過竹都可以著上身呢?原來竹經過炭化左之後可以防潮同吸味,竹炭纖維唔單止可以用嚟整衫之外,仲可以用嚟整化妝品、牙膏、除臭制同清潔用品等等,簡直係萬能!

竹嘅用途真係千變萬化,如果想了解更多嘅話,就唔好錯過我地活現香港(Walk in Hong Kong) 同PMQ元創方合作舉辦童行同感 — 「夏日微旅程」- 賽車建「竹」導賞團。我地可以親眼睇到蒸籠同紥作師傅點樣用竹用到出神入化,仲可以去山貨店尋寶,搵下唔同嘅竹製品,當然唔少得親身試下清涼嘅竹蔗水同埋用竹玩遊戲。記得唔好錯過啦!