美國國會上星期暫時解決債務危機後，美國駐香港總領事夏千福上周末即刻出動，應「Walk in Hong Kong活現香港」呢個文化旅遊社企嘅邀請，參加主題為「生與死」旅程，暢遊中西區了解香港歷史同文化，細味港人生活同死亡嘅活動及禮儀。
身為呢個社企創辦人之一嘅食物及衞生局前政治助理陳智遠（Paul）當日做埋導賞員，帶住夏千福周圍去，遊足三個鐘。朝早先去上環皇后街熟食市場歎中式早餐，之後百無禁忌入棺材舖，又去太平山街百姓廟等參觀。喺棺材舖入面，阿Paul仲展示咗長毛抬棺材請願嘅相片，說明棺材喺香港政治上有一定角色，夏千福笑笑口冇回應。

來港前做足功課

夏千福來港前肯定做足功課，事關路經英國佔領香港時登陸嘅水坑口一帶，夏千福即時講出當年邊個軍官帶隊以及坐邊艘艦，阿Paul都甘拜下風。之後遊到百姓廟、知道百姓廟義祠同旁邊嘅空地曾經借畀保良局做辦公室後，夏千福對最初為遏止誘拐婦孺成立嘅保良局好有興趣，表明關注human trafficking（人口販賣）。