探索舊香港 旅發局推「舊城中環」遊

Source: 明報 | Published: 27 Apr 2017

【明報專訊】屹立中環70年嘅涼茶舖、國父孫中山留下唔少腳毛嘅樓梯、專門收藏香港舊物嘅二手古董店,呢啲統統都係旅發局最新項目「舊城中環」遊嘅重點推介。市民同旅客如果想「重回」殖民時代嘅香港,可以畀錢參加導賞團,或者去旅發局嘅旅客諮詢中心,拎本免費小冊子自己行喇。

設5路線 有導賞團

旅發局花費740萬元,伙拍3個本地旅行社,其中包括由食物及衛生局前政治助理陳智遠搞嘅「活現香港」,幫手設計中上環嘅旅遊路線,5條旅遊路線同歷史、文化、美食等有關。旅發局節目及旅遊產品拓展總經理洪忠興話,3個本地旅行社本身已有舉辦類似嘅旅行團,旅發局就加入幫手推廣,希望畀更多人認識中上環歷史。

活現香港企業發展及策略總監鄧彥心預計,「『舊城中環』精華遊」會喺5月推出,暫未定價錢,但可參考現時由佢哋搞嘅中上環團,3個鐘行程收費480蚊,包帶大家去食蔗汁糕、飲手工啤等,導賞團以5至6人為限,現時多為本地人、外籍旅客參加。

喺必列者士街屹立11年嘅Select 18古董店係精華遊旅點之一,店主Mido係印裔港人,爺爺嗰代開始扎根香港,Mido話鍾意研究香港歷史,想搵番香港1970、80年代嘅感覺,所以蒐集舊物,最後仲開咗呢間舖頭。

閱讀原文