將山旮旯帶入山旮旯：荔枝窩staycation遊記

活現香港有份投資嘅《緣路山旮旯》喺戲院熱播，最近仲突破咗一千萬票房！票房報捷固然令人興奮，而能夠同一班喜歡呢部電影嘅同好，親身走入取景場地，並透過戶外社區放映，同當地居民一齊欣賞套戲，都同樣難能可貴！講緊嘅，係上個月初舉辦嘅荔枝窩行山民宿 Staycation！

有睇過套戲嘅，都會知道荔枝窩貴為香港其中一個山旯旮之地，要入去並唔係咁易⋯⋯平時外人可以搭船入去，而今次大家就取陸路，先到烏蛟騰村，行山步入三椏村食個午膳，先再行入荔枝窩 — 聽到都身水身汗！

為咗支持荔枝窩社區經濟，行程上特登安排村民去為我哋舉辦特色活動。喺民宿卸低行李之後，大家嚟到客家茶棵製作工作坊。動手整完，又點少得親身品嚐地道菜呢？村入面嘅群英姐準備咗豐富嘅傳統客家菜晚餐，比大家喺充滿自然氣息嘅山旯旮地帶，食住傳統客家美食，無所不談。

晚霞散去，黑幕降臨，重頭戲正式開始！大家坐喺荔枝窩東門露天嘅空地，靜靜欣賞《緣路山旮旯》。慶幸天公造美，並冇之前幾日嘅橫風橫雨。村民見到自己條村上鏡、街坊客串，都齊聲歡呼歡笑。睇戲之餘，間唔中又有小朋友嘅嬉戲聲，實在係難忘嘅體驗。

能夠喺車路不通嘅荔枝窩設置熒幕、投影機、音響，有賴村民同義工喺場地幫手，以及阿 Paul 親自出馬，提前幾日搬器材坐船入荔枝窩。村內村外嘅朋友，喺皎潔月光下共聚睇戲，咁美麗畫面，實在得來不易。

播完戲，就係映後談。導演黃浩然同大家分享由籌備、拍攝到上映嘅經過，觀眾又交流下對電影內容嘅睇法，不經不覺已經夜晚9點半，大家收拾好就翻到民宿休息。

嚟到翌日朝早，享用過傳統早餐後，就到梅子林村嘅導賞環節。我哋參觀咗梅子林故事館，了解到沙頭角客家人嘅農耕生活係點樣。故事館亦係戲中陳漢娜飾演嘅女神 Lisa 嘅住處，前一晚睇完電影，第二日就即刻親臨現場，真係寧舍有感覺。