嚟到《活現同人微旅行》第二集，活現香港一眾同事繼續從不一樣嘅角度，發掘社區嘅隱藏風貌！我哋除咗以建築角度拆解樂富邨背後嘅設計，去南丫島一探村屋天台嘅風光，我哋今個月仲衝出香港，去咗中國內地嘅四川，一窺熊貓嘅奧祕！
我哋點樣去成都？喺疫情下，線上境外遊已經成為熱潮！大家安在家中，就可以舒舒服服咁遊覽世界各地。今次活現香港一班同事就喺成都導遊Alex嘅導賞下，參觀全球最大嘅熊貓基地，近距離接觸每日工作只係食、玩、瞓、屙嘅可愛國寶！Alex係熊貓基地嘅義工，亦都係國寶嘅「鏟屎官」，佢分享咗好多熊貓嘅冷知識！我哋仲親眼目擊一對龍鳳熊貓打交嘅精彩場面，如果你都想發掘熊貓鮮為人知嘅秘密，就唔好錯過我哋嚟緊嘅四川熊貓團!
平平無奇的香港屋村建築
大學主修建築文物保護嘅同事 Theodora 家住樂富，以較為學術嘅角度同我地介紹樂富邨。
香港公共屋邨俾人嘅感覺，就好似一個個複製貼上嘅長方盒咁，特色欠奉，但若果花心思留意，其實可以從中發掘到唔少隱藏嘅色彩。樂富邨最吸引 Theodora 嘅地方，在於佢喺設計上採取咗呈梯形嘅斜面設計。最初 Theodora 估計咁樣做係為咗令建築物符合街影法，但之後佢好快發現，唔係喎，對比過舊照近照，甚至睇埋屋邨附近嘅街道佈局，都睇唔到點解屋邨要整成斜面。
後來佢偶然得知，樂富邨嘅建築師原來係有份設計香港大會堂嘅 Alan Fitch，於是佢就明白，樂富邨設計嘅背後必定有更多深入嘅考量。
雖然有待考究，但喺附近芸芸建築入面，斜面嘅設計的確可以帶嚟視覺上嘅新鮮感同動感。Theodora 希望大家行過唔同屋邨時，都可以留意佢哋各自嘅建築設計巧思。
島中島
跟住落嚟不如又聽吓住喺南丫島嘅 Joyce 分享！
近排住喺南丫島嘅 Joyce 本身係西貢人，到底有咩吸引佢千里迢迢搬入去？除咗因為離島嘅慢活節奏比繁忙都市更加放鬆宜人之外，最令佢心動嘅係村屋天台嘅風光。起身之後，Joyce 習慣喺天台做一陣熱身去迎接早晨，然後全日喺天台望住藍天蔚海，chill住home office。有時佢仲會邀請朋友上嚟天台燒烤，同時欣賞落日美景，不亦樂乎。
依附喺小山丘上，每一間村屋嘅天台就好似一個個獨立嘅小島，而每一個小島都各有不同 — 有啲打扮到成個園圃咁放滿盆栽，有啲就係屋主曬太陽發白日夢嘅後花園。對於 Joyce 嚟講，每一個天台都好似一座自成一角嘅島嶼咁，一人獨處固然清幽，但同時彼此都係相連，交織成一幅南丫島獨有嘅畫面。