疫情驟降，活現香港雖然暫時無得同大家出團，但係鍾意瓹窿瓹罅嘅一眾同事，就轉喺屋企附近「微旅行」！2022年，我哋為大家呈獻一連幾集《活現同人微旅行》，分享下同事們點樣喺日常嘅社區中，搵到不一樣嘅角度，設計出專屬自己嘅導賞團。
華富邨：公屋攝影與瀑布灣
首先出場嘅係我哋嘅實習生同學 Victor！修讀物理嘅 Victor，平時一得閒就會揸住相機周圍影相，以光影捕捉眼下美好嘅人情風景。唔知道佢嘅屋企附近，又有咩攝影勝地推介？原來 Victor 係住喺華富邨，一個全港影相最靚嘅公共屋邨！華富邨已有五十幾年邨齡，背山面海，低座在前，高座在後，皆可望海，因此人人稱之為「平民豪宅」。
三支香、公屋貓、黃昏嘅鹹蛋黃⋯⋯呢啲傳統嘅公屋攝影元素影得多，但原來 Victor 自己嘅心水影相位，係邨下面嘅瀑布灣。絕美嘅自然景觀，同民居十分接近，行幾步路就到。自然與城市相鄰，實在係香港先咁獨有。
大埔：宗祠、美食隱於市
同樣鍾意影相嘅，仲有我地嘅同事 Samson！身為大埔居民，Samson 就同大家介紹大埔墟嘅六鄉新村。唔好聽到佢係一條「村」，就以為佢係傳統新界鄉村。企喺大埔新市鎮嘅市區，舉目所見都係四層高嘅唐樓，而地下就有車房、酒吧同埋⋯⋯李氏宗祠？市中心入面，居然夾雜左一座古色古香嘅祠堂？
原來，六鄉新村本來並唔喺大埔，而係六條位於而家船灣淡水湖所在地嘅客家村莊。佢地過住捕魚耕作嘅日子，與世無爭。
喺海上興建嘅水塘。六村嘅居民失去原本嘅生計，唯有搬入大埔市區嘅四層高大廈，由鄉下人變成城市人。好彩，一啲鄉村傳統就仍然得以保留。好似李氏宗祠咁，就係由大廈嘅舖位改裝而成，重置翻當年涌背村嘅祠堂。李氏宗祠平時重門深鎖，一次路過見到佢開咗門，就捉緊機會影咗呢張難得嘅諜照。
分享完呢個「尋找他鄉的故事」，Samson 仲介紹左區內嘅美食名物。喺六鄉新村其中一條橫巷，收埋咗一間完全唔起眼嘅鹵水舖，主理嘅係一對二十幾歲嘅情侶，佢哋嘅鵝油撈麵簡直係世一！
仲有，六鄉樓對面大街嘅一間西式餐廳嘅牛角包亦係大埔名物，牛角包可以自行配搭餡料，全部都抵食夾大份，而 Samson 就私心推薦三文魚碎蛋牛角包！下次有機會去大埔嘅朋友，唔好錯過呢啲美食啦！
將軍澳海濱：岸邊寫意閒遊
講起發掘屋企附近嘅美食，另一位同事 Lesley 同樣好有經驗！講完南區同大埔，而家移去新界東嘅將軍澳先！
家住將軍澳嘅 Lesley，成日比人問起：究竟你嗰區有咩野架？細個住嘅時候，周圍的確無咩設施，有種杳無人煙嘅感覺，不過自從有左海濱長廊同蝴蝶灣橋（將軍澳跨灣連接路）之後，就帶旺左人流，連帶海旁嘅餐廳如雨後春筍咁冒現。
平時可以落嚟吹住海風咁跑步、踩單車。放假嗰陣，最正係約朋友high完tea，沿住海岸散步。如果遇着黃昏時分，仲可以欣賞夕陽緩緩落下，成個海景沐浴喺暮色之中嘅美態。
