2020年5月中，傳出彌敦道190號拆卸圖則獲批嘅消息，一座戰前轉角洋樓響起咗拆卸嘅警號。考城學社聯同二戰戰史專家蔡耀倫、建築師龍文菁以及活現香港，組成咗一支研究團隊，倡議重新審視彌敦道190號價值。
研究過程中，我吔幸運咁遇上首任屋主劉松娣女士嘅孫女陳燕萍女士（Virginia）。陳女士娓娓道來喺190號嘅童年往事，我哋追尋住她記憶中嘅腳步，重新探索呢座建築內塵封數十載嘅秘密。
天台拾憶
時間返到1920年代尾。陳家本身喺美國居留，已經孕育咗三代人，但當時就決定喺香港落地生根。落腳嘅地方，正正係彌敦道190號，從此佢就成為陳家開枝散葉嘅安樂窩，而佢地仲喺地鋪開埋餐廳！Virginia都係喺呢度出世、成長，以至結婚成家。
Virginia細個嗰陣，嫲嫲劉女士唔比佢周圍躝街，所以佢最鍾意上天台玩。天台望到海景，仲種滿咗番茄、生菜同青瓜 — 佢地係嫲嫲特登由美國帶嚟嘅獨有蔬果種子，除咗比一家人平時食用，仲會供應比餐廳。Virginia有時會偷偷地摘低一兩粒小番茄，享受佢哋新鮮可口嘅滋味。
天台嘅一隅，貼住一張陳氏父母新婚嘅甜蜜合照，佢就係Virginia對父母僅存嘅依稀印象 — 母親喺戰前已過身，父親未等到重光嘅一日亦都已經離世，所以Virginia其實係二家嘅獨女，亦係二家嘅遺孤。堅強而獨立嘅Virginia，童年中無乜喊住流眼淚嘅回憶，但每晚喺露台徘徊嘅習慣，就揭示咗戰爭帶比佢嘅傷痕。
回憶中的父親
父親本身成日外出公幹，去到三年零八個月嘅日佔時期，佢轉為留喺屋企，成日匿喺閣樓工作。Virginia會喺走廊觀察父親嘅蹤跡，有時會幫手喺街執煙絲比父親用，呢個就係父女之間最親密嘅時光。
直至一晚，父親剃咗頭髮，戴上氈帽，着上大褸出街，Virginia企喺露台，目送父親怱忙離開。昏暗無光嘅街道上，只見後門門口有兩個黑衣人等緊佢，三個人好似朋友咁，手挽手前往未知嘅地方。如是者，Virginia每晚都喺露台等候父親返嚟，屋企人都話佢有夢遊症。
下一個記憶與父親有關嘅記憶，係一片白茫茫嘅場景。祖母收到來自醫院嘅電話，即刻帶Virginia趕到醫院。醫院係一片白色，父親蓋上嘅布都係白色，他嘅身體好似散開咗咁，Virginia一見到好耐無見嘅父親，馬上想衝去病床拖住佢嘅手，但父親只係虛弱咁離遠耍手 — 或者因為父親病得好重，或者因為醫院多病菌唔方便接近。Virginia企喺病院門口遙望住父親，但就無緣見到佢最後一面，因為幾日之後，家人抬咗一副棺木再次前往醫院，點知父親嘅屍骨早被接走。
同年夏天，香港重光，彌敦道190號亦恢復正常，但Virginia等咗好耐嘅父親始終無返屋企，慢慢亦都無人再提起父親。
真相大白
幾十年後，研究團隊喺《香港工商日報》一則〈陳威廉慘遭毒斃〉嘅新聞，搵到Virginia父親嘅名——陳耀芳（William Chan），就此一步一步走向從未揭開嘅歷史真相。消失嘅父親，原來與保衛香港嘅英軍服務團有住密切關係，當年喺屋企埋頭苦幹，原來就係收集日軍情報，而前來接佢嘅黑衣人，其實係嚟拘捕父親嘅，佢亦喺審訊盤問期間不幸傷重離世，成為無名英雄。
Virginia嘅女兒Amy話，睇到呢份資料嗰陣，係佢呢世人第一次見到媽媽喊。嗰陣Virginia終於明白，70幾年前，佢爸爸陳耀芳到底係為咗咩野而犧牲，真相終於大白。
彌敦道190號承載嘅，唔止係陳家嘅昔日往事，亦係一段屬於香港嘅抗日故事。