活現香港喺2013年成立，由幾個熱愛旅遊嘅朋友創辦，希望發掘自己長大嘅城市入面嘅人文故事，設計有趣嘅「行街團」，轉眼十年過去，我哋訪問咗其中三位共同創辦人，睇下佢哋對呢十年嘅回顧同埋對未來嘅展望。
小編：W // 徐岱靈（Dora）：D // 祁凱達（Haider）：H // 陳智遠（Paul）：P
W：仲記唔記得十年前你哋創辦活現香港嘅時候嘅初心係咩？
H：當年加入活現香港，其中一個最大嘅吸引力係可以帶團，又好玩，又可以俾機會我「發噏風」。例如帶灣仔團，想講一啲古靈精怪嘅故事，就好似做表演咁。幾年後，我哋開始做皇都戲院嘅保育運動，係一個更大嘅機會同埋平台，灌注將我哋對皇都、對香港呢個城市嘅感情。到今年拍咗一套電影出嚟，我覺得甚至係將當年嘅初心帶到去第二個層次，最初都冇諗到咁「大陣仗」！
P: 我當時好想做一樣同旅遊有關嘅嘢，但係未有諗法係咩，純粹係幾鍾意參加「行街團」（Walking Tour），就諗不如做Walking Tour。當時只係試驗形式，開頭嘅時候都係做自己喜歡嘅地區同題目，活現香港嘅理念、意義、想法，都係慢慢做落先變得清晰。
大概去到第一、二年左右，我哋開始見到自己嘅價值：第一、我哋好著重講故事；第二、我哋想連繫其他人，去同人見面、去舖頭、去認識一啲鮮為人知嘅人文故事；第三就是想「捐窿捐罅」去搵一啲嘢去吸引人。後來就唔單純係做生意，而係想做製造某種社會影響，例如搞不一樣嘅旅行體驗，保育運動，甚至做埋電影。
D：我自己好認同要發掘香港整個城市嘅文化軟實力。好多時你去一個城市只會去一次，但當你會想去第二、第三次嘅時候，就係因為呢個城市嘅一啲特質、深入地道嘅文化先會令你想去完一次再一次。開始做「活現香港」其實係問自己，香港本土文化係咩呢？
我哋嘅行街團一開如已經唔止會講歷史，我哋著重講好多文化，會有民生，即係麵檔、茶舖，用啲你呢一刻睇到好貼近生活嘅野嚟連結返歷史。
例如我哋會用茶舖嚟連結鴉片戰爭。究竟係咩引發鴉片戰爭呢？其實唔單止係鴉片！清政府同英國嘅茶、絲綢等等嘅貿易慢慢發展成嚴重嘅貿易逆差，都係不能不提的遠因。。然後我哋就會喺茶店一直飲茶，師傅同你講，其實佢呢間茶舖幾十年嘅「罐」嘅歷史係乜嘢，上面寫嘅毛筆字嘅歷史又係乜嘢，同一時間，可以扣連到整個香港開埠歷史。我覺得如果我係遊客聽到呢啲故事，一定會更加投入同埋感受到香港嘅獨特魅力。
我冇諗過活現香港會走到今天可以贊助電影，搞嘅項目覆蓋咁多地區、有唔同嘅合作單位、仲有線上嘅形式，發展潛力真係好大。我哋握著呢個想講香港嘅文化嘅初衷，先會有皇都嘅保育，我哋唔止係帶行街團，而係展示我哋嘅背後理念：香港嘅特質係乜嘢。
W：十年過去，大家有咩大計想實行，又有咩展望呢？
H：過去咁多年活現香港有參與過拍戲、搞舞台劇、音樂會等活動，有啲係計劃好嘅，有啲就係隨緣而嚟嘅。
P：有幾樣嘢我思考緊嘅。第一、係皇都嘅項目會喺2026年有個小結；第二、會考慮傳承嘅事，思考活現香港嘅定位；第三、想為文化旅遊定一個標準，設計一啲訓練等多啲人可以做好香港嘅文化旅遊。
D：我認同例如喺文化、旅遊方面，我哋可以做啲培訓，讓大家都可以進步，唔係單單一間機構，而係整個行業，將呢個發掘香港特質嘅文化傳播出去。我有一個信念，如果你本身嘅東西係好，你自然就會吸引到新嘅合作夥伴，要一直對機會持開放嘅態度。
後記
活現香港一路走做咗好多大大小小嘅項目，其中有唔少難忘事，之後我哋會有篇文章分享Paul同埋一啲導賞員嘅經歷。
