活現香港嚟到十周年，絕對係我哋公司嘅一個重要里程碑，咁啱又係我個女Maia出世一年，令我有好多反思。
我喺活現香港呢段時間，我哋嘅CEO同共同創辦人Paul嘅家庭迎接咗三個可愛嘅小朋友。喺處理人生嘅起起落落之餘，我哋亦要為活現香港呢艘船掌舵。經歷咗初創嘅挑戰，我哋慶祝第一個項目嘅成功，仲開展咗一場建築物保育運動，當時並唔知會有咩結果。面對史無前例嘅新冠肺炎，旅遊業全面停擺，我哋推出創新嘅線上導賞團，確保我哋嘅團隊可以捱過困局。
喺我加入活現香港嘅全職員工時，我有一個清晰嘅目標，就係想成為呢間機構裡面一個有重要影響力員工，靠建立真摯嘅人際關係嚟發展，而唔係追求極速嘅商業發展，而失去咗與人連結嘅本質。
對我嚟講，行街團（walking tour）完美咁體現到我嘅願景。每一次行行街團，都唔單止係行過個城市嘅街道，而係一趟純真嘅人與人互動旅程。每一步都充滿著引人入勝嘅故事，作為一扇窗，讓我哋睇到香港嘅特質同靈魂，呢個我哋嘅摯愛嘅地方。
呢份對人文關懷嘅追求亦都延伸到我哋嘅企業文化。以我自己為例，我通常朝早喺屋企工作，可以同Maia有多啲時間相處，然後下晝就返公司。開Google Meets視像會議嘅時間，我都會照顧Maia，有時甚至係幫佢換尿片。我會儘量安排同客戶嘅會議喺個女午睡嘅時候進行。而晚上，當Maia訓覺之後，我就會做一啲路線設計同研究嘅工作。
我哋明白人生中有啲時候會發生唔同嘅情況，而家庭責任有時候更加重要。當團隊入面有人因為私人原因需要請假嘅時候，我哋就會全力支持佢哋。但係我哋亦會期望佢哋喺其他時間補足工作，盡力分擔工作嘅負擔。信任係我哋團隊互動嘅基石，係每一個團隊成員透過負責任嘅態度同埋擔當嚟贏得互信。
我哋知道，有啲時候我哋未必樣樣嘢都可以做到，但係我哋會遵守一啲基本原則，有啲似撫養小朋友。呢個過程複雜，有時會出現混亂，有笑有淚，但係最終係有意義嘅。
我哋嘅團隊充滿熱誠、責任感、靈活，由人本主義嘅觀念引導。我哋堅持相信為香港做啲有意義嘅事，如果你同我哋一樣對建立人與人之間嘅連結充滿熱情，同埋想成為我哋旅程嘅一部分，歡迎你加入我哋嘅團隊。
鄧彥心 （Olivia Tang）
執行董事
活現香港
Olivia喺處理日常工作嘅同時，亦花時間陪住Maia 
Maia幫媽媽「工作」