活現香港創業邁向第七年,決定將我哋辦導賞團、搞活動遇見過嘅人同事寫成一系列小品文章,公諸同好,等大家抗疫期間即使足不出戶亦可以細味香港嘅故事。

侯晴同學係第一屆「恒隆.築跡——年輕建築師計劃」嘅參加者,回想起喺計劃入面嘅所見所學,佢仍感獲益良多。

侯晴同學自細就好鍾意畫畫,直至 15、16 歲嘅時候,原本單純熱愛藝術嘅佢突然被建築學深深吸引住,因為佢覺得建築就好似係一座巨大嘅雕像,只不過佢裏面嘅空間運用要再進一步有效地規劃。由嗰陣開始,侯晴同學就主動去讀唔同建築嘅歷史同資料,希望更加了解建築同美學之間嘅關係。所以,當侯晴同學喺 2017 年得知恒隆地產即將舉辦「年輕建築師計劃」,佢就毅然決定參加,希望藉此拓闊自己嘅眼界。

恒隆地產同活現香港喺 2017-18 學年首次舉辦「恒隆.築跡——年輕建築師計劃」,係喺本港中學程度嘅建築教育領域手執牛耳嘅先驅。侯晴同學參與其中,收穫甚豐。

而計劃裏面嘅建築導賞團正正就豐富咗佢對香港建築文化同歷史嘅認識,侯晴同學更喺實地觀賞建築物時,發現咗唔少佢以前忽略咗嘅香港美,為佢帶嚟咗好多反思。

即使侯晴同學現正喺大學主修視覺藝術,並未以成為建築師為目標,但佢認為喺當中所學到嘅建築設計技巧、所感受到嘅建築美學,以及對社區規劃嘅思考,為佢宜家嘅藝術創作提供唔少靈感同幫助。最令人驚喜嘅係,侯晴同學喺計劃中汲取到嘅養份亦推動咗佢細佬——侯朗——參加第二屆「恒隆.築跡——年輕建築師計劃」。

兩屆「恒隆.築跡——年輕建築師計劃」都用導賞團形式帶領同學深入社區,實地考察在地建築設計同規劃議題。

受家族嘅影響,侯朗同學同樣熱愛藝術。唔單止係哥哥,佢哋嘅叔叔更係一位建築師,曾經參與香港機場和上海國際金融中心等大型建築項目。喺佢哋兩位的薰陶下,侯朗同學開始對設計,尤其係建築學深感興趣。得知哥哥參加完計劃後滿載而歸,再加上老師的極力推薦下,讀緊中四嘅侯朗最終決定參加呢個第二年舉辦嘅計劃。

有志將來成為建築師嘅侯朗同學認為,計劃教授咗有關繪製數碼 3D 模型、速畫、模型製作等方面嘅知識,呢啲喺設計建築時所需嘅實用技巧,為佢未來嘅職業發展紮下根基,裨益不淺。

將建築知識融匯變通並灌入無限創意,侯朗同學的組別最後仲喺「敢築我城」創意設計比賽中勇奪獎項。佢表示喺構思建築計劃嘅時候,與意見不一嘅組員磨合令佢最有深刻感受。當時有一部分嘅組員希望以保育建築物為前題,而另一啲嘅組員就希望以現代化建築物、時尚化外觀作為主要目標。不過佢哋都有住相同嘅目標,所以過程中大家都努力磨合。最終出嚟嘅計劃書平衡到各方意見,比一開始有偏頗嘅方向來得更全面,令佢明白到團隊精神在建築完善社區時嘅重要性。

侯朗同佢嘅組員曾經喺設計意念方面有分歧,但最終都能夠和衷共濟,最終入選十大優秀隊伍。

呢個計劃令侯朗同學更加認定佢希望成為建築師的念頭,所以佢喺中學選科嘅時候就選擇咗修讀視覺藝術,朝住考入大學建築系嘅目標邁進!我哋希望侯晴、侯朗同學都能夠帶住喺計劃入面得到嘅啟發,實現夢想啦!