活現香港同香港民間古蹟保育基金聯合出品嘅電影《尚未完場》於2023年4月喺香港國際電影節首映（按此觀看電影預告片）。呢個係一個講述一代「娛樂大亨」歐德禮（Harry Odell，1896-1975）同一個時代嘅香港嘅故事。5年前，活現香港嘅共同創辦人祁凱達（Haider）同徐岱靈（Dora）決定製作一套同紀錄片。我哋同佢兩位導演做咗個訪問，請佢哋分享有關呢套電影嘅幕後花絮。
小編：W
徐岱靈（Dora）：D
祁凱達（Haider）：H
W：宜家套戲都出咗超過兩個月，你哋對於觀眾嘅返應有冇覺得超乎想像呢？
D：非常超乎我哋想像啊！歐德禮係一個年代久遠嘅人物 — 「白人、鬼佬、阿伯、唔靚仔」，完全同新一代KOL嘅賣座特徵背道而馳。我哋最初係唔知點「sell」呢個人！可能就係因為我們有這個強烈的自覺，所以意識到要同當代（contemporary）扣上關係，仲要令到大眾都會明白我哋講咩，盡量令所有人都有一種共鳴。
我哋本來覺得套戲未必好受歡迎，宜家喜出望外，大家都好喜歡！我覺得主要嘅功臣就係Haider！（笑）
H：我覺得主要功臣就係Dora，諗到用「偵探故事」嘅講故事手法。其他人話男主角演得好，其實我只係做自己。其實我從來都無打算上鏡。一開始想搵一個人去串連整個故事，曾經考慮過請張敬軒做聲音導航，又有諗過請蕭叔叔扮歐德禮講英文，不過最後並冇實行。去到後期，察覺因為我係最熟悉、最喜歡Odell嘅人，所以由我講返就好理所當然，最容易、最自然。後來出嚟嘅效果，我見網上好多人都話喜歡我哋嘅純粹，有啲事情係錢買唔到嘅。
W：製作呢套電影嘅時候，有冇遇到一啲難忘嘅經歷或者困難呢?
D：有時會覺得係Odell「顯靈」！例如我哋一直只有香港電台存檔嘅聲音檔案同埋一啲舊剪報，缺乏吸引嘅畫面，比較死板。直到香港第五波疫情期間，Odell嘅孫突然搵返一大堆家庭錄像，可以用喺紀錄片入面，大大增加咗歐德禮呢個人物存在感同真實感。
又例如因爲《尚未完場》遇到嘅有緣人Rigo。我哋都有搵到一啲同歐德禮好有關聯嘅人 ，不過係直至電影製作後期，先搵到曾經為歐德禮工作嘅Rigo，呢一切來得非常合時。
H：電影裡面有好多歷史片段，讓50年代嘅香港再次出現嘅觀眾眼前。呢啲片段都係由一位荷蘭老人家授權我哋使用。呢位老人家叫做Michael Rogge，係一位喺50年代初曾經喺香港居住嘅外國人，著西裝喺中環返工。當時佢有一部攝影機，即使返工幾忙碌，佢都會抽時間喺星期日放假嘅時候周圍去，到處拍低香港嘅社會面貌。石硤尾大火之後佢有去拍災後情況，又會去影下木屋區、避風塘，將香港一啲社會日常拍低。
嗰啲片其實已經數碼化咗，放喺YouTube上，而我亦曾經都喺網上睇過呢啲影片，於是我就膽粗粗咁用電郵聯絡影片擁有人搏下，但當時我連拍攝者係咪仲在生都唔知。緣份很奇妙，Rogge好快回覆，仲話佢記得Harry Odell呢個人，甚至原來喺Odell手上得過一個攝影比賽嘅獎！Rogge現屆93歲高齡，仲係好精靈㗎！
W：對於呢套戲嘅未來，你哋有什麼期望呢？
D：純粹希望多啲人可以睇到，希望大家可以喺電影中各自有佢哋嘅得著，或者有一些能量可以帶走。
H : 其實播放咗超過兩個月，我哋又知道咗多啲新故事，對整件事嘅理解、體會都豐富咗好多。有好多人問我哋會唔會拍續集或者寫書，不過我同Dora更有興趣搞工作坊，例如找檔案紀錄嘅技巧，用呢啲資料嘅方法同心得，又可以同大家討論一下點樣學以至用嚟做咩計劃，就好似自己屋企嘅歷史或者社區故事研究。呼應返我哋套戲《尚未完場》，其實係拋磚引玉，等大家一齊玩落去。
後記
十年前活現香港嘅出現，先會有皇都戲院嘅保育運動，導演們形容呢套戲係一封俾香港嘅情書，唔單止講一幢舊建築，同埋一個人，仲講緊一個時代嘅故事。
活現十年，尚未完場。下一篇文章，活現香港嘅各位共同創辦人會同大家回顧過去，展望將來，分享過往十年嘅深刻點滴。