彌敦道190號:第二話

上回提要:彌敦道 190 號呢座戰前洋樓唔單止充滿建築保育價值,仲見證咗陳家一段可歌可泣嘅抗戰故事。本來呢段已經湮沒咗嘅舊事,全賴 190 號保育倡議團隊不懈咁翻查資料,一直查證推敲,憑住蛛絲螞跡搵落去,先至重現到成段歷史。今次就帶大家一窺呢班幕後功臣嘅努力!

一切從舊相開始

自從彌敦道 190 號嘅拆卸申請獲批之後,一班矢志於保育嘅民間人士就聚首一堂,諗下可以做到啲咩。

有一日,佢哋瀏覽緊討論香港歷史嘅網站 Gwulo.com,無意中見到 190 號嘅舊相。除咗洋樓嘅舊貌,仲搵到入面嘅家庭生活照,相片嘅說明文字仲幾詳細。

專門討論香港歷史的網站 Gwulo.com

唔通上載相片嘅用戶,曾經住過喺 190 號?佢哋決定碰下運氣,喺留言區追問詳情,就係咁樣成功聯絡到 Amy 同佢媽媽 Virginia。

(亦即係原屋主嘅第3代及第4代後人,想知更多,就睇翻上一集啦!)

經過幾次錄音、電話通話及Zoom對談,團隊搜羅到陳家生活照片、舊剪報,同埋 Virginia 爸爸陳耀芳嘅日記,仲發現咗而家呢座用作商業用途嘅洋樓,以前原來曾經做過餐廳,甚至喺日佔時期做過日軍飯堂!

永青餐室

從餐廳到戰犯報導

有咗呢啲重要史料,就知道下一步要搵啲咩檔案,但係過程都唔容易。初時團隊不斷喺舊報章系統搜尋「彌敦道 190 號」、「常/長青餐室」、「陳耀芳」等關鍵字,不過就一無所獲。

直至一次搵緊餐室報導嘅時候,陰差陽錯之下,讀到日佔時期戰犯審判案嘅相關報章,睇吓睇吓,竟然見到「陳威廉慘遭毒斃」嘅報導,而 William 正正係 Virginia 爸爸嘅英文名!一輪抽絲剝繭後,總算確認到陳耀芳之所以被捕,某程度上應該同英軍服務團有關。

《香港工商日報》之相關報導

層層挑戰

查閱審訊報導,其實都幾花功夫,因為聆訊嘅筆錄資料可能有誤,又或者會翻譯出錯。人名有相似,譯成英文更加難認。為咗確保講緊嘅係 Virginia 爸爸,每睇一篇報導都要對翻中英版本嘅內文。另外申請檔案都係一大挑戰。搜集史料嘅時候,有啲已經毀於戰亂,有啲因為相關機構要保障私隱而婉拒。

雖然公開資源唔多,我吔都唔放過任何線索,無幾耐終於有所突破。當時英軍服務團成員被捕係同日本憲兵密探息息相關,所以當研究方向轉向呢班密探之後,就搵到更多資料,其中一個大發現係陳耀芳原來同佢哥哥陳耀南(Henry Chan)一齊喺戰時進行情報工作!

日軍軍事部署位置名單(節錄)
陳氏兄弟合照

彌敦道 190 號與陳家以至抗日歷史嘅關係,雖然仲有好多細節要補充,但係多得一班團隊成員勞苦功高咁爬梳史料,總算為 Virginia 爸爸嘅生平拼湊出一個大概,亦都係話緊比大家知道,彌敦道 190 號真係同香港歷史好有淵源。